AIDS vei khawmpuiah ka kal ve a!

–  Kenny Muankima

Hei hi 2018 June thla vel daih tawha Mizorama PLHIV Conference hmasa ber ka tel ve ṭuma ka report ziah a ni a, PLHIV te chakna a pek a, a cho phur takin kan suan lut tlaikhawhnu leh a ni e. A thui deuh nain a thu ken hi uluk deuha chhiar kan tum dawn nia..

Dt. 5th – 7th June, 2018 chhung khan Mizorama a vawi khatna atan Aizawlah PLHIV (People living with HIV) Conference hman a ni a. Vanneihthlak takin an zingah tela he hun chhim tur hian hun țha pek ka ni ve hlauh mai a, ka hlawkpuiin ka kâl lovang tih ka hlauh ngawih ngawih avang leh, a kal ve lo leh inkhawmpui an nei a ni tih lo hre ve lem lo te tan pawh a lo hlâwk tak mialin kha Inkhawmpui kha kan review ve reng reng teh ang.

A thupuia ka hman hi a dik lo nghal hu a, mahse he natna leh a hrik kan hriat dan dik tawk lohzia tifiah turin a dik loh ang ang hian ka hmang lui a ni zaw ber. HIV hi Human Immunodeficiency Virus tihna a ni a. Chumi awmzia chu mawlmang tak chuan ‘taksa ralvengtu tlakchham tirtu natna hrik‘ ti pawhin a sawi theih awm e.

Chu natna hrik – HIV chu miin a thisena a kai rualin AIDS a vei tihna a ni nghal lo chungin keini chuan AIDS vei kan ti mai țhin a. A nihna takah chuan miin he natna hrik hi a kai a nih chuan HIV Positive emaw PLHIV hi a sawi dan tur dik zawk chu a ni. AIDS (Acquired Immune Deficiency Syndrome emaw Acquired Immunodeficiency Syndrome) hi HIV vanga natna lo piang chu a ni na meuh mai a, mahse a nihna takah chuan hei hi chu an last stage ang – PLHIV in treatment a lâk țhat loh avanga a taksa ralvengtu a lo chhiat a, natna hrang hrang a lo fawm kem tawh a, enkawl vak ngaihna a awm tawh bar loh hun stage-a an natna hming kha a ni.

Chuvangin AIDS stage ah hian an luh lohna turin PLHIV reng reng chu a rang thei ang bera treatment pek an ni țhin a. An enkawlna hi ART (Antiretroviral treatment/therapy) tih niin an damdawi ei țhin hi ARV (Antiretroviral) tiin an sawi țhin. Chuti a nih chuan ART la chuan ARV a ei țhin tihna a nih chu. A fiah em aw!?

PLHIV in a hunbi dik takah ARV hi a ei zat zat a nih chuan a lo rei hnuin a taksaa HIV hmuh theih loh hial khawpin he damdawi hian a heng natna hrik te hi a tițhuanawp (suppress) thei a. Mahse chuvangin a that chimit ta tihna erawh a ni lem lo. Chutiang dinhmun miin a thleng a nih chuan he natna hrik kai ve lo nena an danglamna awm chhun chu a ni chuan darkar 24 danah damdawi ei a la ngai reng kha a ni deuh thawthang awm a sin.. Damna kim ni lo mahse, chu tluka dinhmun duhthusam chu HIV kai tawh tan a awm chuang lo..

Thupuiah lut phawt ila, a țul tâk a leh heti lam chu kan la sawizui leh zawk dawn nia.

Dt. 5th June, 2018 khan Synod Conference Centre midangin an lo book tawh avangin Hawla Auditorium ah Conference hi bul țan a ni a, a tuk – Dt. 6th June, 2018 ațangin Synod Conference Centre lamah insuan phei a ni thung. He Conference ni 3 chhung hian a ni khatnaah mi 180 vel, ni hnihnaah mi 140 vel leh a ni thumnaah mi 150 velin Conference an chhim a. Mipa aiin hmeichhia an kal țhahnem zawk zel bawk.

Mizorama PLHIV Conference hmasa ber hi CARE – World Vision India, Gan Sabra, FHI360 leh MSACS te țangkawpin an buatsaih a ni a. A kal zawng zawng tana T-Shirt an sem piah lamah TA an pe vek a. Tin, thlenna tur nei lo te tan riahna leh ei leh in tur an ngaihtuahsak vek bawk. He Conference ah hian a lo berah Nuaih 5 vel tal chu sen ral a nih a rinawm a. Hetia ngaihtuah mai chuan mipui nawlpui, a hmuna tel ve lem lo chuan sum hi uiawm tham viauin a lang ngei ang. Mahse, kha Conference khan rah țha a chhuah ngei ka ring tlat a, a kal apiang maiin tisa leh thlaraua hlawkthlak an tih deuh zelah kan ram leh hnam pawhin a himpui sawtin ka ring a, ka beisei.

Ka hre sual lo a nih chuan Serchhip District tih loh District dang ațang chuan PLHIV tel/kal an awm vek niin ka hria a. An haw hunah mahni hmun țheuhah an thiam leh theih, an phâk tâwk ang zelin he ram leh hnam chhan tura an țan thar viau hlawm ka ring tlat bawk. Chutih rual chuan HIV+ zawng zawngte hian ngai pawimawh vek se, tel vek thei ni se a hlawkthlak lehzual ngeiin a rinawm.

A ni indawt leh programme ang diak diaka review ka tum lem lo a, mipui nawlpuiin kan hriatpui atana pawimawh tur chinah zel ka lawrkhawm diat diat dawn a ni.

Conference Programme hi ruahmanna felfai tak nen duan lâwk vek a ni a, PLHIV te tana hriat tur leh hriat țul topic hran hranin mithiam leh thawktu lam ațangin thusawi hran hran ngaihthlak a ni a, thusawi apiang mai a ngaihnawmin a hlawkthlak em em mai a ni. He field a lo thawk sa tan pawh retreat a nih ber avangin a khamawm loh a, a ngaihnawmin a bengvarthlak em em vek a ni ber. Chung thusawi hrang hrang zinga ka tarlan duh zual bik deuh deuh te chu:

Dr. R.L. Sanghluna:
Ani hi chuan Zoram khawvelah introduction a mamawh tawh kher lovang. “Mizo IDU (Injecting Drugs User) leh AIDS vei te pa..” an tih hial țhin kha a ni a. Ani hian addiction chungchangah zirtirna țangkai leh ngaihnawm em em mai a pe a. Addiction hi rilru lama dam lohna, ngaihnep theih miah loh, vuak reh theih loh leh shock sim theih chi a nih lohzia te, dam thei tawh lo, engtik hunah pawh chhuak leh thei a nih avanga tal chhuah tumte pawhin rilru fim taka ruahmanna felfai tak nena hmachhawn ngai a nihzia fiah fel fai takin a sawi a. Damdawi lo addict tawh, nghei thei tawh si lo, nghei duh bawk si te tana țanpui tura OST (Opioid substitution therapy – methadone or buprenorphine) a awm thu te, illegal drugs nena khaikhina OST țhat zawkna point hrang hrang nen chiang takin a hrilhfiah kelh a. Kei chuan kha tluka OST chungchang fiah zawka hrilhfiahna ka la ngaithla ngai lo. Hetiang mi kan lo awm a, OST chungchang hi kan la hre fuh ngai lo a nih chuan mahni hnaih ber TI (Targeted Intervention – eg. AMRO, Shalom etc) emaw OST Centre emaw pana mahni nun chhan tura a kawnghmang zawhfiah vat chi a ni a. Nu leh pa lam pawhin hei hi kan hre fuh lo a nih chuan i zirchiang deuh deuh teh ang u.

Dr. Christina:
Ani hi Aizawl ART Centre lam Doctor niin ka hria. Ani hian ART lâk țhat a pawimawhna leh ART vanga thil thleng thei hrang hrang te PowerPoint Presentation nena țangkawpin fiah takin a sawi bawk a. PLHIV te pawhin ti kha chuan chuan ART Centre-a ART awmzia an lo hrilhfiah aia chiang leh fiah zawkin an chiangin an fiah tawh ang a, an ngai pawimawh sawtin an nun mai bakah an hmangaihte nun an chhan phah ngei a beiseiawm..

Dr. Chawnglungmuana:
Dr. Chawnglungmuana hi Shalom lama an Director niin ama țawngkam takin “HIV te hi natna lerh tak mai, natna hrang hrang ngaihzawn hrat tak” an nih avangin HIV+ tena an kai sam em em Hepatitis B leh C chungchangah zirtirna fiah fel fai takin mi a pe bawk a. A hlawkthlak țhin teh e..

Nui Sailo:
ANC (Antenatal Care) lamah Nui Sailo hnen ațangin HIV+ hmeichhiain a nau paia HIV a kaichhawn theih dan leh a inven dan kawngte chiang taka ngaihthlak niin, a venpuina lam buaipui tura Project Ahana a awm tawh thute a sawi chhuak a. District tin viltu Ahana Field Officer te leh Office lam Staff te hming leh number tar chhuah a ni bawk a. Khami vang ngawt pawh khan HIV+ nu nau pai ten an fateah HIV natna hrik an kai tlem sawtin a rinawm! District hran hran Field Officer (FO) te leh an biakpawhna number hi mamawh kan awm takin kan tar tel ang a, anni pawhin an hna a nih avangin pawi an ti lo turah ngai ang. HIV+ raipuar zingah kawnghmang hre lo kan awm a nih chuan mahni awmna district FO te hi kan call vat dawn nia..
Aizawl East – Henry – 9612660119
Aizawl West – Rki – 7085881647
Siaha – Dovi – 8256942184
Lawngtlai – Zodina – 9774773646
Mamit – Angela – 9774758531
Champhai – Maliani – 9862148466
Champhai – Sangtea – 96155517123
Lunglei – Albert – 9774988715
Serchhip – Nuni – 8731070872
Kolasib – Zorini – 8974829125

Loon Gangte:
Ani hi Delhi Network of Positive People, Mizoramah pawh organisation lama funding rawn buaipui thei hial, kha pawl founder kha a ni a. He huna thusawi tur hrim hrima an chah chhuah a ni. Zu leh damdawi ngawlvei țhin niin an sawi a, mahse chu chu a recover hnuah a țha zawnga hmangtu a ni! Matric a pass lova, mahse Asia khawmualpui level pawhin thlan chhuah a lo ni tawh țhin a ni awm e. Ani hi kum 1997 vela HIV+ a nih inhre chhuak a ni a, a ruihhlo khawih ațanga inzir chuak a ni. A sawi dan chuan “Damdawi rui țhin mi chuan pawisa a neih leh neih loh, damdawi a neih leh neih loh a ngaihtuah lo. Tih a tum tawp a, a ti leh nge nge țhin. Chu spirit chu thil țha tihna’n midang tana malsawmna nihna atan ka hmang ta thung a ni..” tiin a sawizawm zelnaah “Thil țha tih i tum daltu che chu tu pawh nise i tan hmelma a ni a, țanpuitu che erawh i tan țhian a ni..” tiin HIV+ anga a thil tawn hrang hrang leh an hmalakna te behchhanin ‘Positive Living‘ topic a thupui ber a. A țawng pai ber titi hi a ngaihnawm ber emaw tih tur a ni. A HIV+ puite chu an damdawi ei (ARV) hrechiang turin a fuihin a chah a, “Kan tih tur dik tak tia a hun dik taka damdawi kan ei chuan Pathian hian a tih tur a lo ti ve mai!” tiin a nupui, HIV- in fa neih a duh vanga a taksa virus awm tițhuanawp (viral supression) tura damdawi țha taka a ei a, a viral load an test hnuhnung pathuma virus an detect theih loh hnua fa nei tura condom tel lova nupa nun an hman tâk dan te sawiin, “ART (ARV) hi ka tan chauh himna a ni lova, ka nupui hmangaih em em leh ka fa harh tak tak te tan pawh damna a lo ni ta a nih chu..,” tiin ama tawn ngei ațangin treatment lak țhat pawimawhzia a puang bawk. A nupui faunau te hi HIV hrik lakah an him vek a ni! A PLHIV pui te chu chawmhlawm ni lo tur leh mahni kea din tum tlat turin a chah a. Chumi tur chuan an hrisel a ngaih thu leh an tana hriselna ban theih awm chhun chu ART a nih thu uar takin a sawi bawk. Tin, PLHIV Pawl leh NGO hrang hrang te pawh fund awm vang chauha activity nei lova, an activity hmanga fund hlawhchhuak zawk turin a challenge bawk. Tin, Mizorama PLHIV te chu thi nasa a tihzia sawiin “Mizoram statistic ah chuan AIDS vanga thi tam tak an awm, mahse kei chuan Mizo zingah AIDS vanga thi an la awm lo, mahni inthup vang zawk a thi an ni..” tiin PLHIV te chu miin an hmuh dan tur aia treatment țha taka an lâk theih dan tur thupui ber turin a fuih bawk.

Dr. Rev. Vanlalruata Hmar:
Dt. 6th June, 2018 bikah hian zan lam Programme siam a ni a. He hunah hian tuna Aizawl English Congregation Church a pastor ni mek leh Mapuia Crisis Centre founder Dr. Rev. Vanlalruata Hmar chuan “Khawngaihna” thupuia hmangin thlarau lam châwm thu țha tak a sawi a. A kamchhuak pakhat, “Khawngaihna huanah chuan thingzar tliak tawh pawhin rah a chhuah țhin” tih thu hmanga ama nuna a harsatna tawh dan leh Pathiana damna a lo chan leh tâk dan a sawi chuan kalkhawmte a vel nasa hle.. Tin, a thusawi zawhah hian Break Through Ministry lamin zaihona mi an neihpui zui bawk tak e..

Konga Khawlhring:
Ani hi Mizorama PLHIV ten an chanvo dik an chan theihna atana pioneer te zinga mi, Positive Network of Mizoram (PNM) hruaitu lo ni tawh țhin niin he hunah hian Official Cameraman a ni a. Conference tawp dawn lama duh duh tana thusawina hun an hawnah rawn ding chhuakin, “Hawh u i bon ang u, kan turu ve hi a ngai. I thi mai mai tawh lovang u, a ho tlat..” tiin PLHIV te chu mi khawngaihna ngawta innghat lova mahni ke a ding tur leh hrisel taka an awm theihna tura treatment ngai pawimawh turin a fuih a. Mizoram PLHIV te an boral nasat danah treatment kan ngai pawimawh tâwk lovah a ngai niin a lang.

Thusawitu zawng zawng leh an thusawi zawng zawng ka tarlang seng lova, hun leh hmun a awm hek lo. Mahse chiang taka ka hriat erawh a kal zingah khan PLHIV Conference hi awm tawh lo tura duhtu an awm ka ring lo hulhual a, duhthusamah phei chuan next ah chuan Mizoram PLHIV te hi 80% tal tel thei se, HIV hrikin a tihbuai ve loh te pawh hian a tam thei ang berin chhim bawk ila, hlawkna leh sawtna a thuah hnih thuah thum ngawtin a rinawm.

He Conference ah hian Mizoram pum huapa PLHIV te mai bakah he field a tuimi te leh PLHIV chhungte pawh tel theihna tur pawl – Federation din niin hruaitu tur te pawh ruat chhuah an ni nghal bawk a. Anni hmalakna zarah District level ah lungphum nghet takin phum ni se, mipui nawlpui hi kan ram ata he natna umbo tur hian lungrual takin ke i pen suau suau mai ila a duhawm hle.

Tin, sawi loh theih loh leh sawi hmaih phal miah lo tur chu, Conference tawp dawn hian intiamna hun an hmang a, an intiamna thu a țawngkam mawi em em mai chu “He natna hrik – HIV hi keimahah a tâwp ang..” tih kha a ni. Anni chuan kan himna duhin khati khan kan tan thu an tiam a, an tan engnge kan tih ve dawn le!?

Programme zawng zawng kimchang takin sawi sen a ni lova, tikhan, “Kham lo tak leh hlawk takin 1st Mizoram PLHIV Conference chu kan zo ta a ni” tiin i duhtawk phawt mai ang.

He Conference buatsaih a nih theihna atan hun, tha, sum leh ngaihtuahna sengtu zawng zawngte tutu nge an nih ka hre lo, mahse he huna tel ve min phalsaktute zawng zawng nen inzaa chungah lawmthu ka sawi tak meuh meuh a, Lalpa’n a let tamin malsawm mawlh che u rawh se.

Nang malsawmna ni ang che…

You may also like:

Updated: January 26, 2019 — 8:23 am

Leave a Reply

Your email address will not be published.