“AIDS vei te hi puang zel se kan him zawk ang!”

Kenny Muankima

Kan hriat ṭheuh angin National AIDS Control Organisation (NACO) in kum 2018-a a tihchuah ‘HIV Estimation 2017 Report‘ ah Mizoram chu India rama HIV detection rate sanna ber state kan ni a ni mai lo a, kan sang filawr uchuak larh a. Pawm har kan ti a, a tak tak ni theiah kan ngai lova, ṭhenkhat phei chuan mawhpuh tur zawngin data dik tawk lo leh ziahpunah hial te kan puh a. MSACS in a hmalak dan dik tawk loh vanga ngai tlat hi kan tam awm e.. Hetianga hriatchian duh neia MSACS zawhna zawt duh leh rawtna pe duh tan chuan MSACS Official Instagram Account ah contact in, an office a leng kher lo pawhin a biakpawh theih turah ngai ila..

Kan dinhmun kan pawm theih hlawl loh avanga kan ram ata HIV/AIDS dona kawng ṭha ber nia a tam zawk mahin kan ngaihtuah chhuah ve leh kan lo aupui ve sek ṭhin chu “AIDS vei te hi puang zel se kan him zawk ang” tih hi a ni a. Chuvangin kan rilrua he ngaihdan bet tlat lai bik te hi tun ṭum chu i han bihchiang dawn chhin teh ang.

A hmasa berah chuan Mizoram ah hian MSACS pawhin AIDS vei hi engzah nge awm an hriat kher a rinawm loh tihlai aṭang hian kan ṭan daih teh ang! Miin AIDS a vei chuan, HIV a kai hnuah treatment a lak loh avanga a nunna derthawnga a awm tawh hnu, a last stage ang a nih avangin MSACS tan pawh chutiang dinhmun a ding chu Mizo zingah engzah chiah nge awm hriat a har khawp ang. Tun hmain ‘Test & Treat‘ – test a positive te treatment pek nghal zel – hi kalpui a ni lo a, tunhnaiah chauh kalpui a nih avangin positive an nih hriatchhuah tawh si, treatment la lova bibo tawh leh umzui hleih theih tawh loh pawh tam tak an awm ngeiin a rinawm si a.

Chuta ṭanga chiang ta ni a lang chu HIV leh AIDS hi kan hrechiang lo hle a ni tih hi! Hriaah kan inngai a, mahse HIV leh AIDS hi thil hran daih a nihzia pawh kan hrethiam chuang si lo..

HIV kai te hi puang zel se kan him zawk ang” tih chu ni se a dik zawkin a lang a. Mahse hei pawh hi a rem lohna leh fuh lohna, rawtna ṭha tak a nih lohzia lam zawk hi kan hmuh hmaih fo vanga rawt ve hluai ṭhin kan ni. Khaih mah aw..

1. Kum 2018 khan ‘HIV Act 2017‘ tihchhuah a ni a, India danin an dinhmun puanzar hi a khap miau avangin kan puangzar duh a nih chuan MSACS level leh NACO level ah pawh hmalak theih map loh a ni a, ‘India constitution‘ kan sawi danglam a ngai!

2. Tunah hian Mizoram mipui zawng zawngin HIV test kan la nei lo, test loha mahni dinhmun hre lo hi a kai tawh leh dinhmun hre tawh let tam kan nih a rinawm a. Chuvangin lo puangzar zel thei dawn ta tehreng pawh ni ila, heng kan sawi zinga engzah hian nge HIV hi lo kai ve tawh a hriat si loh avangin anni dinhmun hi puan tel theih a ni dawn lo hrim hrim chiang sa a. A kai tawh hriat sa aia let tam an ni thei tlat bawk si..

3. MSACS data compilation hnuhnung ber aṭanga a lan danin Mizorama an test tawh zinga March 2019 thlenga positive zat hi 19631 a ni a. Mahse mi engzah chiahin nge test tawh a, engzah chiahin nge la test lo hriat a har khawp mai. Test tawh si, an test laia him ngei si zingah pawh lo kai thar leh hman engzah nge awm tih a hriat loh a, la test lo zingah hian mi engzahin nge kai tawh tih phei chu hriat ngaihna awm map lo a ni. Kai hnuah pawh detect theih a nih hnua test chauha kai leh kai loh hriat theih a ni si a. Chuvangin kan detect apiang puanzar theih pawh lo ni ta tehreng se la, tumahin an test thar duh tawh loh chuan a lo kai si test ngam si lo ho tan chuan AIDS vei leh midang hnena HIV kai chhawn bak hmabak a awm lo a, kan dinhmun a him lo zual sauh tihna zawk a ni.

4. A kai apiang puanzar an nih chuan a kai an puan te lakah khan kan inveng ṭung ang a, an puan zinga tel lo te kha HIV laka fihlim ngaiha kan ngaih vek dawn avangin an puan tel loh lakah chuan kan inthlahzal ngei ang a, an lo him vek dawn si loh avangin kan him lo telh telh zawk dawn tihna a ni a.

5. Mizoram pum hriata an detect thar apiang puan thar zel dan tur kawng hi a vang hle mai a. MSACS hian website emaw application emaw pawh hmang ta tehreng se, miin a châkna chhuah hnuah khawdang/vengdang mi a mutpui tur kha HIV kai list-a a tel leh tel loh a browse hman tawh chuang lo ang. Hman ta tehreng pawh ni se, an awmna laiah internet a lo chhia a nih phei chuan chuti hlauh!

Heng point 5 aṭanga rilru a lo lang ta chu TITANIC lawng lian pil ta kha! Kha lawng kha ‘pil thei lo‘ tia chhal ngat a ni a. A zinkawng hmasa ber a zawh ṭum khan an hmaa vurtlang an hmuh thu an captain an hrilh khan ani chuan an inven theih ringin su darha tawntlang tura an speed tisang turin thu a pe a. Mahse, an han su ta a le, kha vurtlang khan tuipui chhung hmuh theih loh chinah zung nghet taka kaiin pawn lama lang chin let tam taka lian kha vur a lo khawn khir un mai si a, pil thei lo meuh pawhin a pil phah a, an him inven theihna tura captain in thutlukna a siam khan an zain a pil pui ta a nih kha. He thawnthu tawi te hi kan ram dinhmun nen ngaihtuah kawp ta ila, kan rawtna rawt chhuah leh kan zawhna zawh ṭhin aṭang hian HIV leh AIDS chungchang hi hre tawh intia awareness lo hnuchhawn mai chi kan nih lohzia a tichiang a, mahni ṭhuthmuna ‘ka ngaihdan chuan‘ lo ti ve sek satliah ngawt lo a, kan inven theihna atan leh kan him theihna atan zirchian chaka tuihal huam huam awm zawk kan nihzia a tilang chiang viau awm e..

Hawh u, keini zawngin i ngaithlain i chhiar zel ila, zir zelin zirtirna te zawm zel ila, keini leh kan chhungte i chhanhim hlauh ang u!

Lo him ula, lo hlim ang che u.. 🤗

You may also like:

Updated: September 12, 2019 — 1:23 pm

Leave a Reply

Your email address will not be published.