Anti-Lentivirus siam chhan

Mizoram ah HIV a darh zual zel a, kan inzirtira kan inchah lawm lawm a, a thawktu lamin chhun zan zawma an thawk chung pawhin kai thar zât a tlahniam hlei thei lova, chuvangin Social Media kaltlanga mitin ban phaka inzirtirna leh inkaihhruaina chhawpchhuah hi a ṭulin ka hre ta a. A thiam ber leh a hre ber ka ni hauh lo chungin, mi tu emaw talin a lo hlawkpuia, a lo sawtpui takin tiin he Anti-Lentivirus hi ka siam tir ve ta tawp mai a ni.

A nihna takah chuan HIV/AIDS Awareness nei tura in koh khawm hi a har khawp mai a, hriat sa leh hriat hnu a ngaiin mitin mai hian kan ngaihthah vek emaw tih tur a ni a. Mahse he natnat hrik leh he natna kan hriat fuh tawk loh vanga hetiang dinhmun hi thleng kan ni si a, chuvangin ka hriat chin leh UNAIDS thu leh hla bakah thu dang dang ka chhiar leh seminar/training hran hrana ka zirchhuah te midang tana ṭangkai thei tur awm ang te he hmunah hian ka chhawp chhuak dawn a, midang hnenah pawh khawngaih takin Anti-Lentivirus chungchang hi lo hrilh vein tlawh turin in lo sawm ve ṭhin dawn nia.

He Anti-Lentivirus ah hi chuan thingtlang pa, ziak leh chhiar thiam cha cha te pawhin an hriatthiam theih tura a mawlmang thei ang bera ziah zel ka tum a, medical term te pawh a theih chin chinah Mizo ṭawnga chhawp tel zel ka tum ve chu a ni a, chuvangin hmundanga kan Awareness dawn ṭhin te nen pawh a in ang kher lo mai thei tih kan hre lâwk dawn nia.

Hetia Anti-Lentivirus ka siam nachhan pawh, nakin zelah chhiar leh duhin a khawma a lo awm sa mai khan hai let a nuam a, chu mai bakah android application in he Anti-Lentivirus hi la siam leh theih a nih piah lamah Facebook lamah page ang pawha la siam zel theih a nih vangte a ni bawk.

He ‘Anti-Lentivirus‘ tih ka hman nachhan pawh a hma chuan Blogger lamah blog ka siam a, mahse Lalsangpuia Ralte puihna zarah application a khawrpum theih a nih dawn lai vel khan a hming tur ka van em avangin helama thawktute leh mi ṭhahnemngai ka hmelhriat apiang ka be kual a. Thurawn min pe thei an awm dawn lo emaw tih hnuah CZi Ralte khian “Lentivirus tih hi lo en chhin teh..” a ti ta hlauh mai a, ka enchhin hnuah a fuh viau in ka hria a. “Eng ang retrovirus pawh ni se, kai a nih hnu fea natna langchhuak ṭhin..“ṭhin sawina a nih avangin HIV/AIDS pehhel deuha sawina atan pawh a ṭha dawnin ka hria a, a ven leh a kai tawhte pawh kawng kawh hmuh kan tum ber a nih dawn avangin a hmalamah ‘Anti” belhin ‘Anti-Lentivirus tih hming hi a lo chawi ta a ni.

He Anti-Lentivirus min lo hlutpuitu  te chungah ka lawm a, midang pawh lo kawhhmuh ve zel turin ka sawm nghal bawk a che u.

KA LAWM E..

 

Kenny Muankima

You may also like:

Updated: February 6, 2019 — 2:13 am

1 Comment

Add a Comment
  1. App dl ve chiah.. bengvarthlak dawn khawp mai.. nang nge2 i fakawm hle mai.. duhsakna ka hlan a che..

Leave a Reply

Your email address will not be published.