ARV ṭhatzia sawi hi HIV sawinêpna a ni lo!

Kenny Muankima

Hriat ṭheuh angin Mizoramah rapthlak khawpin HIV a darh chak a, India rama hemi field a thuneitu sang NACO mai pawh ni tawh lovin khawvel a thuneitu sang UNAIDS meuh pawhin kan ram a hawi tawh a, US Ambassador meuh pawh a lo kal rup rup hial a nih kha! Chu chuan sawi ngai lohin awareness kan mamawhzia chu a tichiang reng. Hria emaw kan intih, kan hriat a dik tâwk leh ṭhin si lo lai tak hi a ni kan mutan ber pakhat!

HIV khawvel ah chuan ‘Treatment is prevention‘ an tih hial khawpin treatment la ṭha te taksaah chuan viral load (thisena virus tam lam) a tihniam thei a, UNAIDS phei chuan undetectable level a awm lai phei chuan miin a nupui/pasal hnenah a kaichhawng tawh lo tih a puang hial reng a. Chuvangin a kai tawh te ṭha taka an inekawl hian an nunna atan mai a ni tawh lo a, HIV darh zel tur venna a ni tel tawh. A chhan pawh viral load nei tlem apiangin midang kaina chance an neih hniam vang a ni!

Chumi avang leh kan Mizo pui HIV kai zingah ARV ṭhatna leh nihna tak pawh pha lo leh la hre lo an tam em em a, tam tak phei chu an thih hun nghakin keini min hmaizah vang leh mualpho hlauin an biru tlawk tlawk a ni ber! Chuvangin hei hi a hman apiang leh a hria apiangin kan aupui a ngai, kan ram leh hnam hi kan chhan duh chuan..

Chuvangin anni thleng phak a au a ngai a, he thu, an nunna chhanna tur leh kan ram leh hnam venhimna tur hi sawi uar zel a ngai a. Dik tak chuan Mizo zinga HIV kai tawh zawng zawng hian an damchhungin undetectable status nei thei ngar ngar ta se, kan ramah HIV hi kan pho ro thei ngei ang. Mahse, tunah chuan mi hriat hlauh vang leh mualpho hlauh vangin ban phak renga an ṭhatpui tur awma pawh chu ban ngam lo za tam tak an la awm cheu si! Chu mai a ni lo, inringhlel reng chung pawha in test ngam chuang lo thlengin! Chuvangin HIV kai tawh te tana chanchinṭha hi a hun leh hun lovah pawh kan hril zel a ngai a ni ber tawh zawk!

Mahse, hriat fuh leh hriat fiah tawk lohna vangin, chu awareness chu kan Mizopui te nunna chhan tur leh kan hnam chhanhim tura ARV ṭhatzia aupui a nih lahin hetianga au te hi a ni HIV tidarhtute chu kan la ti ta dah a!? Khawvel pumin a venna an tih kha keini chuan a tidarhtu tiin kan kâwk a nih chu!

I bul maiah, i hnampui ngeiin vanduaina tawkin HIV a kai a, treatment la duh lovin a biru a, “Lo thi mai mai teh se..” i ti ngam dawn em ni!? A in ang reng a sin.. Hetianga au te hi PLHIV (HIV+) te koh chhuaha treatment lak tir tuma au te an ni a, he au hla hian a kai ve lo nang leh kei min ko ve lo! Mahse, chumi chu kan hrethiam lo nge, a vanduai tawh te enkawlna ṭhatzia sawi hi hnawksak kan ti hlawm tlat zu nia! Chu chu a Mizo em? A Kristian em? Khawiah nge humanity!?

HIV hlauhawmzia hi chu sawi pawh ngai lovin a chiang sa tih chu khawvel pumin UNAIDS hnuaia heti fakau maia kan buaipui danah hian a chiang sa reng a. Sawi nawn ngai lo khawpa hlauhawm, a hlauhawm em avanga sawi nawn fo ngai si a ni. Mahse, naupang kan ni emaw, ṭhalai kan ni emaw, puitling pawh ni ila, HIV enkawlna ARV ṭhat tawhzia an sawi hian HIV hlauhawm lohzia an sawinaah lo ngai tawh lul suh u. ARV hi ṭha telh telh mahse HIV hi chu a hlauhawm ngai rengin a la hlauhawm..

Damchhungin nitin hun bi neiin loh theih lohna vangin damdawi chak tak i ei peih dawn em ni? Heti khawpa inthliarhranna leh inentleuna hi i damchhungin i phur zo dawn em ni? Mahni indah pawimawh leh lansarh duh em em khan mahni insitna leh zah ruk ngawih ngawihna hi i phur zo meuh ang maw!?

Nang chuan heng hi lo chhut chiang la, lo khirh ve suh la, HIV hi lo basa ngam suh la, lo inveng la, lo him ang che..

You may also like:

Updated: October 8, 2019 — 4:49 pm

3 Comments

Add a Comment
  1. A thu chu a van țha teh lûl em a dik bawk si he thu hi chu pawimawh tâk a ni

  2. Thu tha tak ani e, au pui zel hi a ngai a ni. 👍👍

  3. ART leh ARV danglamna hi ka vn hre duh ve

Leave a Reply

Your email address will not be published.