CD4 count hi engtihna nge!?

Kenny Muankima

CD4 Count hi kan sawi ri reng nachungin a awmzia tak hriat loh ve theih a ni a, a bangbo zawkte tan a awmzia hi sawifiah ve reng reng ila a ṭha awm e. A nihna kan chian hian a pawimawhzia pawh a chiang dawn si a.

Smartphone hmang ṭhin chuan kan hre ṭheuh ang a, awlsam takin kan mobile hmaia lang kha a thla lak theih a ni a, chutiang chu screenshot kan ti mai ṭhin. Tichuan khualkhuaa kan chhungte hnenah pawh kan mobile hmai ami, an hmuh phak miah loh tur CD4 count kha kan hmuh tir thei ṭhin

CD4 count pawh hi khatiang deuh kha a ni a, kan taksa ralvengtu neih mek te ṭhat zawng hriat theihna tura a thla lak ang deuh a ni. Taksa chhung ami, mita kan hmuh theih si loh kan hriat theihna a ni.

CD4 cell, CD4+ T cell tia an sawi bawk, te hi kan taksaa natna lo do lettu ‘thisen var‘ (white blood cells) kan tih te kha an ni a, chuvangin neih tam poh leh a ṭha ting a ni mai. Chumi tam zawng enna chu CD4 count tiin kan sawi ta a ni.

HIV hrikin a tihchhiata a tihhlum ber te chu heng ‘thisen var‘ kan tih te hi a ni a. HIV hrik a pun nasat poh leh heng cell te hi an tlahniam dawn tihna a nih deuh ber chu.

A nih dan phungah chuan mihring hian CD4 cell hi 500-1,500 vel kan nei tlangpui a, AIDS natna miin a vei meuh hi chuan a CD4 count hi 200 hnuaiah a lo awm tawh ṭhin. HIV hrik vanga CD4 tlahniam te hi a tlangpuiin HIV treatment (ART) lak ṭhat hian a sang chho leh ṭhin a ni.

Chuvangin kan taksa dinhmun hriatchianna atan te, treatment kan lak ṭhat vanga hma kan sawn dan leh treatment kan lak loh vanga kan tlakchhiat dan enna chi khat a ni a. Chuvangin mahni incho phur tur te, ART lak a pawimawhzia kan chianna atan te CD4 count hi a hrechiang apiangin an ngai pawimawh mai ṭhin a ni.

Tichinah khan duhtawk phawt ila, hemi zawhah Viral Load Count kan bihchiang leh dawn nia..

Ref: U.S. Department of Veteran Affairs

You may also like:

Updated: October 9, 2019 — 8:56 am

Leave a Reply

Your email address will not be published.