Hepatitis chungchang tlem!

Kenny Muankima

Nikum khan Pathian khawngaihna a zarah ‘National Consultation on Viral Hepatitis‘ hmangin New Delhi ah ka zuk kal ve a. Chumi hnu lamah chuan hepatitis chungchang ka thailan khât zia vawiina HIV chungchang group pakhata zawhna vangin ka inhrechhuak chiah a. Chuvangin kha consultation a ka zuk zir chhuah tlem a zawng kan share tlai khawhnu ang e. {HIV opportunistic infection lâr ber zinga pakhat a nih tel avangin Anti-Lentivirus ah hian kan rawn dah tel a, OI dang te pawh la rawn dah zel kan lo tum dawn nia..}

Hepatitis hi Mizo te chuan thin (liver) natna kan tih mai ṭhin kha a ni a, thin cancer hial pawh a siam thei. He natna hi hepatitis virus vanga darh leh kai ni ber mahse ruihhlo (zu, damdawi, etc) vang pawhin kai/neih theih a ni.

Hepatitis virus hi chi 5 a awm a, chuvangin a kai a te pawh a virus hming hian Hepatitis A, Hepatitis B, Hepatitis C, Hepatitis D leh Hepatitis E kai/vei tiin kan sawi mai ṭhin. Heng virus chi 5 te hian natna leh damlohna an thlen piah lamah thihna hial an thlen thei a, a darh chak nasa mai bawk si a, HIV tluk zeta kan hriatchian ngai leh kai lo tura inven ngai a ni. A bikin B leh C phei hi chu damchhunga vei palh theih a nih avangin fimkhur leh kai palh pawha inenkawl ran ngai tak tho a ni zual bik niin an sawi.

Hepatitis A leh E hi chu a tlangpuiin a hrik awmna chaw leh tui ei leh in vang a ni tlangpui a. Hepatitis B, C leh D hi chu a kaia te taksa tuihnang khawihna aṭanga inkaichhawn a ni tlangpui niin a lang. Hepatitis B bik phei hi chu nuin fa a hrin laiin a faah a kai thei a, chhungkaw member te pawhin naupangah an kai theih mai bakah sex aṭang pawhin inkaichhawn theih ni a sawi a ni.

Heng virus kai hlim hian natna vak an nei lo thei a, mahse a tam zawka a lanchhuah danah chuan jaundice (mit leh vun eng pup), zun nu duk khuih, chauh hluah hluahna, chhungril damlo hluah hluah leh luak chhuah hlui, luak, pum leh serh bawr vel na tein a lang chhuak ṭhin.

Chuvangin hetiang ang hian kan awm palh a nih chuan a rang thei ang bera in entir ngei ngei tur a ni..

He natna kai nia inringhlel te tan ICMR Viral Hepatitis Task Force Project hnuaiah Aizawl Civil Hospital ah in entir theih a ni e. Anni hian Viral Hepatitis zawng zawng (Hepatitis A – E) an test thei a ni. Chu mai bakah Centre dang nen ṭangkawpin North-East India Hepatitis chungchang zirchianna an kalpui mek bawk. Centre danga diagnosed sa te erawh an test nawn sak thei lo thung. A hrechiang duh leh in entir duh tan, Dr. Lalroṭhuama (Medicine) leh he Project a thawk te hi Aizawl Civil Hospital-ah a zawh theih ang.

Kumin January khan New Delhi hi chuan Free Treatment an kick-off tawh laiin keini state ah erawh vawiin thlengin thawm a la dai dak! Tunge au dawn a, tunge hma hruai dawn!?

You may also like:

Updated: November 1, 2019 — 8:39 am

2 Comments

Add a Comment
  1. Gospel Lalthangkima

    Hepatitis C hi a symtoms lan chhuah dan tlangpui min hrilh thei em aw..

  2. Hepatitis C ka nia damdawi ka mahmawh ani

Leave a Reply

Your email address will not be published.