HIV/AIDS awareness a Kohhran pawimawhna

Lalchhuanzuali (CZi Ralte)

1. Kohhran aṭanga hmalak a ṭulna chhan: Hun hnuhnungah chuan hri ka len tir ang tiin Bible ah chuan a inziak a , mahse Mosia hunlai pawh khan hri a len tir dawn khan ami te himna tur chuan beram no thisen kawngkhar bangah tat turin a hrilh a nih kha. Kha khan a entir chu hun lo la awm tura ami te kan invenna/himna tur chu Isua chhandam nih hriatna hi a ni. Chu chuan tun a hri leng mek HIV laka kan himna tur chu Pathian aṭang chauh a nih zia a lang chiang hle a ni. Chuvang chuan Pathian mi hriat rawngbawltu te chuan HIV hmalakna kawngah Pathian thu nena zirtirna peka ṭan kan lak nasat a ngai hle a ni. Nelson Mandela khan mingo an beih dawn khan a thuihruai Bishop khan, “Mingo ho an lo kal ang a, Pathian thu an rawn hrilh che u ang a, an ṭawngṭaisak che u ang a, in maimitchhin chhung khan an rawk che u..” a ti a ni.

2. HIV Prevention:
a) Condom hian mipat hmeichhiatna aṭanga HIV kan kai tur min venghim thei a ni thei e, Lalpa laka kan tih sual erawh min venghim zo lo. Bible-in mipat hmeichhiatna chungchangah a him zawk a sawi lova, nupa nun atan chauh a nih erawh Genesis-ah (Genesis 1:28) khan min zirtir avangin ṭhalai te hi ‘abstinence’ leh ‘be faithful’ zawnga Kohhran hian awmze nei zawka kan zirtir hi a pawimawh a ni.
b) Kristian te hi engvanga nupui pasal neih hmaa mipat hmeichhiatna hmang lo tur nge kan nih tih hi kan inhrilh hriat tam a pawimawh (1 Thessalonika 4:3-8 /1 Korinth 6:18-20)
c) Ṭhalaite zingah “Tih chhinna tel lo chuan ngawl a vei theih loh..” tih hi kan sawi tam a pawimawh. (Rom 7:21-23)
d) Mipat hmeichhiatna leh ruihhlo ti thei tura thlemna hi ṭhalai tu paw’n tawk thei kan nihzia inhrilh hriat a, a hneh dan tur thuruk kan inhrilh a pawimawh (1 Korinth 10:13/Matthaia 16:24-25/Matthaia 26:41)
5) Mipat hmeichhiatna humsual dai tawh leh ruihhlo bawih a tlu lut tawh te hian ṭangkaina nei tawh lo leh laktlak tawh lo a inngaihna kan nei nasa a, mihring puite ah rinna hloh tawh leh ṭangkai tawh lo pawh ni mah i la, kan Pathian mit hmuhah tal chuan ṭangkaina kan la nei a, hlutna kan nei ve a ni. Chu chu ringtute tan chuan a pawimawh ber zawk a ni (Ephesi 2:1-5) tih inhrilhhriat a pawimawh.

3. Care and Support for PLHIV: Mizoram chhunga HIV kai tam ber te hi tudang an ni lova, kan Mizo-puite an ni. Mizo te hi Kristian sakhua vek kan ni a, kan ram chhunga positive te hi khawi emaw ber Kohhran member zing ami an ni. Tin, kan ram chhunga HIV darh mek hi, a kai apiang hian tih darh duhna emaw midang kai ni lo se chuan a darh thei lo. Amaherawh chu hetiang natna lungchhiat tak kai tawh ni chunga midang kai mai pawi tih lohna kan neihna chhan hi engvang nge? A kai ve lo te hian an lakah rilru hrisel kan put loh avang hian kan ramah hian a darh nasa pawh a ni thei. Engti zawngin nge rilru hrisel chu an lakah kan put tak ang:
a) Thiam loh chantirna: HIV kaite chu kan rilruah an sual vang leh thiam loh chantirna rilru kan put avangin khawi aṭanga kai nge a nih hriat chakna rilru kan nei nghal a. A inpuang leh positive tih kan hriat te chu “Khawi aṭang kai nge i nih?” tiin zawhna kan zawh loh pawhin kan rilru talin a zawt fo reng a nih hi. An hun kal tawhah eng emaw taka khawsa tura ngaihna rilru kan neih ṭhin vang a ni. Kan ram chhunga positive te kan en dan aṭang hi chuan, an humsual dai vanga kai te leh an ruihtheih thil tih vanga kai te tan chuan han insawi mai hi a harsa a ni.
b) Kan chunga thleng ve tura ruat loh avanga hmusitna: Kum 2007 aṭang khan HIV Positive ka nih ka inpuang ṭan tawh a, ka inpuan tirh khan ka ṭhiannu nu hian “CZ, lo leng lo leng tawh suh, ka fanu hi a ni ve emaw an ti ang a, an ringhlel palh ang. Inkawm tawh suh ..u” tiin kan inkhawm bang kan lenglut chu min lo ṭawng khum a, ka rilru natzia chu a sawi pawh ka sawi fiah thiam lo. ‘Ka lamhnai ṭhiante pawn min thinhrik chuan ka va inpuanna, hmelhriat loh te phei chuan min va thinhrik nasa dawn em‘ tih hi ka rilru a awm a, midang kai mai pawh pawi tih lohna rilru te ka pu hman nghe nghe a ni. Kum 2010 khan mi ka aṭangin ka ṭhiannu chu a positive tih ka hre ta a. A ṭhiannu hetiang dinhmuna ding ka awm reng chunga a harsatna engmah min hrilh lo chu mak ka ti em em mai a, ka va zawt ta tawp a. A nu min ṭawngkhum tawhna avang khan inenkawlna lak pawh an ngam lova, mi hriat hlau reng rengin an lo awm chu niin.. ‘HIV kai te kan hriatthiamna‘ hi a kai te tan chauh ni lovin kan chhungkuaah emaw, kan chungah emaw lo thleng palh pawh ni se, dawnsawn dan kan thiamna atan leh a lo thlen ve lohna tura a kaite kan hriatthiam a, HIV chungchang kan hriatchian hi a pawimawh tak zet a ni.
c) Thinhrikna leh endawngna: HIV positive te kan inhmuh khawm reng renga kan sawi tam ber chu kan taksaa HIV hrikin harsatna min thlen aiin a kai ve lo te min en dan dik lo leh min thinhrikna hi kan sawi tam ber leh na kan tih ber a ni ṭhin. Chu chuan mimal tin ten thinhrikna leh endawngna hi kan kal kan a ṭulzia a tichiang mai awm e.
d) Hriat chian loh a pawi: HIV/AIDS chungchang hrechiang mang hlei lova kan rinthu leh ngaihdan nena bawlphuan kuala kan sawi vak vak ṭhin hian a kai te thinhrikna rilru min put tir a, ngun taka chhut chuan hei pawh hian kan ramah HIV a tidarh niin a sawi theih ang.
e) Pathian hremna in ngaihsakna: Kan ṭhiannu Wendy chuan, “Ka positive tirh khan rawngbawltu pakhat ka pan a, ani chuan: ‘I tuh rah i seng a nih kha’ tiin min lo ṭawngkhum a. Ka rilru na lutuk chuan ‘midang hi kai tam ila an la hrethiam ve mai ang’ tih rilru te min put tir hman a. Mahse fanu ka nei a, ka fanu future tur chu ka ngaihtuah avangin Pathian duhdan angin ka nung ta chauh a ni” tiin a harsatna tawhna hmasa ber chungchang a sawi ṭhin. Johanna 9:1-2 ah khan kan hmu ang a, pian tirh ata mitdel kha “Rabbi, tuin nge tisual? A nu leh pain nge amah hian?” tia an zawh khan Isua chuan, “A nu leh pain an tisual lova, amah pawhin a tisual lo, Pathian hnathawh lanna tur zawk a ni..” a tih ang deuh khan keini HIV positive te hi Pathian hmangaihna thuk zia tilang tura a hnathawh lanna tur a hmanrua te kan ni. Hremna ang ni lova chuti zawnga min pawm sak chu a ngai a ni..
f) Lalpa’n min hmangaih a sin: HIV positive pakhat chu Aids stage a nih tawh avangin thla 8 chhung natna khumah a mu tawh a, a taksa a chhe vek tawh a, a rilru erawh a la harh tlat! Ka rilrua lo awm ta chu kan taksa hi awngrawp vek mahse, kan Pathian hian thlarau damna kan neih min la duhsak em mai a, chuvang chuan he natna hi min pe niin ka hre ta. Kan unanunu pawh kha a inpeih theihna turin a rilru fimin Lalpan a siam ni berin ka hria (Jeremiah 29:11)

A hnuaia hi Kohhran hmalakna hrang hrang internet kaltlanga ka hmuh te ka rawn tarlang nghal e.. A ṭhen hi document a ni a, a ṭhen hi chu site a ni e. Lo download duh emaw, lo en duh te kan awm takin..

Site:
1. Oikoumene.org
2. lds.org
3. Oikoumene.org
4. cdc.gov
5. caritas.org

Document:
1. Roles of Churches francism
2. Publication & Report – HIV/AIDS Policy
3. ELCT-HIV-AIDS-Policy

Heng te hi en thuak a ka hmuh te a ni a, hma la duh Kohhran tan chuan a dang pawh tam tak Internet kaltlanga zir tur a la awm ngei ang. Heti chinah hian i duhtawk phawt mai ang..

You may also like:

Updated: January 25, 2019 — 2:25 pm

1 Comment

Add a Comment
  1. biak theih na che ka va duh ve, WhatsApp vel ah pawh,pawilo..

Leave a Reply

Your email address will not be published.