Mizoram HIV Status: Upto March 2019

Alan Muanpuia, State TI Co-Ordinator

{He thu hi Pu Alan-a‘n Mizoram HIV/AIDS chungchang Facebook Group lama a post a ni a, kan lo ṭangkaipui takin ka rawn suan lut e.. Post ami statistics hi en a har deuh takin post mawngah pdf a download theih a ni e..}

Mizoram HIV Statistics update March 2019 chu a lo chhuak leh ta e. Tun ṭumah hian No. of blood test (thisen test zat) rawn dah a ni ta lova, hei hi thil thar deuh chu a ni. Tun hma lam khan thisen test zat hi dah ṭhin a ni a, mi tam takin kan hrilhfiah dan a dik tawk loh avang leh chumi aṭanga eng eng emaw lo zeldin a lo sawi zui ta chiam chiam an awm ṭhin avang te, mi thiam pui pui zingah pawh hriat fuh tawk loh a awm theih ṭhin avangin a buaipuitu lamte leh hotuten dah tel tawh loh mai hi ṭha an ti ta deuh a ni. Bakah thisen test hi tunhma aiin a awlsam lehzual ta a, chuvangin ICTC ni kher lova lo test leh positive anga lo inpawm ta hi a awm theih dawn ta viau mai a. Tuna data kan lo tihchhuah hi chu MSACS hnuaia ICTC data hi innghahna pui bera rin a ni tih pawh hretlang ta ila a ṭha awm e.

Kum 1999, kum 20 liamta mai kha chuan Mizoram-a HIV data kan neih chu mipa 6 leh hmeichhia 1, avaiin 7 chauh a la ni a. February 1999-a AIDS Cell, Directorate of Health Services, Govt. of Mizoram in report a tihchhuah-a a lan dan chuan Kum 15-25 inkarah HIV kai mi 3 an awm a, kum 26-35 inkarah mi 4 an awm. HIV hrikpai mi 7 zinga 6 te hi Injecting Drug Users (IDU) an ni a, inchiuna hriau inhmantawm ṭhin an ni a, an zinga 4 hi chuan multiple sexual partner an nei bawk. HIV kai mi 7 zinga 1 hi hmeichhia a ni a, a pasal IDU a ni thung tih zirchianna aṭangin a lang a, kum thum an inneih hnuah an inṭhen zui leh tih pawh zirchianna hian a sawilang bawk. (Source: Dr. Lalramliana, “A cross-sectional study of HIV Infection in High Risk Groups in Aizawl, Mizoram” An unpublished study report under supervised field training program for Diploma in Public Health, Calcutta University, 1999)

Kum 20 a liam hnu hian HIV inkaichhawnna tam ber 68% zet hi sex atangin a ni tih a lang chiang a, inchiu ṭhin (IDU) zingah HIV kai za zelah mi 28% vel an la awm cheu bawk. Nu naupai zinga HIV hmuhchhuah thar pawhin pun lam a la pan zel tih Data atang hian a lang leh bawk a. Hei hian HIV hi kai awlsam tur bika ngaih, High Risk Group (HRG)-ah chauh ni lovin, mipui nawlpuiah he hrileng hian a kangkai tawh a ni tih a lang chiang em em bawk a ni.

HIV kai zingah kum 25 atanga kum 34 inkar an tam ber a, za zela 42 zet an ni. HIV an kai ṭan tirh hi hriat a ni lo nachungin kum 25 an tlin hmaa HIV kai hi engemaw zat chu an awm rin a ni a, chuti a nih chuan tleirawl kum 15-24 inkara mi za zela 23 lai HIV kai an ni hian ngaihtuahna a ti kalthui hle bawk.

Mihring hun tawn-ah kum 15-49 inkar hi kan that vanglai tak a ni a, chumi rual heti taka HIV kan kaidarh nasa hian kan ram ei leh bar thlengin nghawng a nei ngei dawn tih hi a lang chiang em em a. Chhungkaw din chho zelna turah nasa takin nghawng a nei dawn bawk a ni.

Hei vang hian mitin te kan ṭhanharh a hun ta hle mai. A bik takin Mizo mipa te tan lak a ngai zual. Kohhran lian ber Presbyterian Kohhran inchhiarna-ah chuan mipa aiin hmeichhia an tam zawk a, election a vote nei thei inchhiarnaah pawh Mizoramah hian mipa vote nei aiin hmeichhe vote nei an tam zawk bawk. Hetih lai hian damdawiina nau piang-ah chuan mipa an la tam zawk zel lawi si! HIV Data aṭang hian hmeichhia aiin mipa ten HIV an kai nasa zawk a, an dinhmun a derthawng zawk tih a lang reng a. Hengte avang leh ruihhlo dangte avang pawhin mipa vote nei thei chin hi an thi tam zawk a, chuvangin hmeichhia aiin mipa kan ramah an tlem ta zawk a ni.

Kan ram kan hnam chhan hna hi tumahin min rawn thawhsak dawn lova, tuna a ramchhunga chengte hian mawh kan phur nasa ber a ni. Ṭhangthar lo awm leh zel tur tan chenna tlaka kan ram kan siam zel hi kan zavaia mawhphurhna a ni e.

Mizoram HIV Status: Upto March 2019

    Mizoram HIV Statistics 2019

 

Download: Mizoram HIV/AIDS Statistics – March 2019

You may also like:

Updated: October 7, 2019 — 7:23 am

2 Comments

Add a Comment
  1. a va han ṭha teh lul em!

  2. Jacob Vl Khawlhring

    NGO leh Kohhran pawl hrang hrang te pawh hian, in hrilhhriat tam a pawimawh zia kan hriat a hun tawh hle in ka hria. Post ṭha hle msi, beng a vâr sawt e.

Leave a Reply

Your email address will not be published.