HIV chungchanga kan hriat fuh loh fo hi!

Kenny Muankima

A hma pawhin ka lo ziak tawh a, ‘HIV kan hmuh dan hi!‘ tihah pawh khan heti lam hawi hian ka ziak tawh. Mahse chhiar fuh lo kan la awm a nih hmel, zawhna a awm leh tâk fovah chuan kan ziak nawn leh sak ang e!

HIV/AIDS chungchangah hian Denialism hi hman ata khawvel pumah a awm ve a. A ṭhenin HIV hi a awm tak tak an ring lo a, a ṭhenin AIDS a thlen theih an ring lo a, a ṭhenin treatment hian hna a thawk tak tak lovin an sawi a. An ṭanfung a in ang lo thluah mai. Mahse, khawvel puma chiang sa erawh Denialism a hluarna ram apiangah HIV a darh chak! Awih la, awih suh la chu chu thudik! Mahse, tuna kan thupui tur erawh kan rama HIV chungchanga kan buaina..

Kan ramah ngei pawh thil kan hriat fuh tawk loh vanga HIV chungchang a nih tawh chuan hnial tum nghal pan mai kan kat ta nawk mai. A nihna takah chuan hei hi Awareness/Advocacy kan ngaihthah vang leh kan ngaihthlak ve chhunah pawh thinlung hawnga kan ngaihthlak loh vang a ni fo.

Nupa, a pakhat zawk zawk HIV+ ni si, a kawppuiin rei tak a kai ve loh avang te, HIV+ tih hre miah lova sex hmanpui, a lo positive reng si avanga hlauthawnga mahni in test a lo thianghlim vang te, HIV+ nena inchiuna hriau inhmanṭawm si kai lo hlauh vang te leh a chhan dang dang vang tein HIV hi a awm tak tak loh emaw, inkaichhawn mai mai theih a nih lohzia chiangah riak kan inruat fo mai a. Chu zirtirna chu a darh telh telh avangin kan ziak nawn leh reng reng ang e.

A hnuaia table hi Centres for Disease Control & Prevention (Natna chi hrang hrang khawvel puma zirchiang ṭhintu lar ber, US lama inbengbel, CDC an tih mai ṭhin kha) lamin estimate an siam a ni a. Hei hi hrethiam vek ni ila, a dik lo zawngin kan auin thu kan thehdarh fo lo tur!

HIV chungchanga kan hriat fuh loh fo hi!

Kai theihna dinhmuna an din (risk exposure) vawi 10000 zela kai theihna chance/risk awm zat zel a ni a. Mahse, chutih rualin viral load (HIV+ thisen zungzama HIV tam leh tam loh dan) a zirin hei hi chu a risk hi a danglam thei hle dawn tih erawh hre tel ta ila. He estimate ang hian kan chian loh lai hi sawifiah i han tum dawn teh ang..

Kan buaina tam dan indawtin i han saiwfiah dawn chhin teh ang:
1. Mipa leh hmeichhe inpawlna aṭang hian risk exposure 10000 zelah mipain vawi 4 kai theihna chance a neih laiin hmeichhiain vawi 8 kai theihna chance a nei a. Nupa, pakhat zawk positive in a kawppui a kai chhawn loh chhan pawh kha a la vanneih vang mai a ni a, a risk a la tawng baw lo a, a tawng baw har hlauha a vannei rih tihna a ni. Chutiang bawkin HIV+ lo mutpui chungchangah pawh.
2. Hriau inhmanṭawm aṭang hian risk exposure 10000 zelah vawi 63 kai theihna chance a awm anga chhut a ni a, hriau inhmanṭawm chunga a lo kai lo a nih chuan a risk a la tawng baw lova, a la vannei tihna a ni mai.

MAHSE!
A chunga kan hmuh leh sawi te khian an vanduai ni an la tawn loh avang maiin HIV hi nu thuri zuam ngawt chi a ni lo. Kan hriat miah loh chu a risk a khi engtik hunah nge kan tawn dawn a hriat loh lai tak hi HIV hlauhawmna ber pakhat a ni a. I awih emaw, awih lo emaw, sawi theih a awm lo. Mahse Mizo zingah ngei pawh tuna HIV+ zingah hian vawi khat tihsual vanga vanduai ta an awm nawk tawh.

A awmzia chu a vanduai chuan mipa a ni emaw, hmeichhia a ni emaw pawh ni se a vawi khat sex hman naah a kai nawlh thei a, chutiang chiah chuan inchiuna hriau inhmanṭawmah pawh. Chutih rualin a vannei te erawh chu sex vawi 9900 an hman hnuah emaw vawi 9900 hriau an inhmanṭawm hnuah pawh an la him tlat thei lawi. Hei hi HIV danglamna em em, kan hriatfuh loh fo lawi si chu a ni.

Mahse, chuvang maia HIV hi kan zuam a nih ngawt zawngin, a ṭum khatna a vanduaiah khan kan ṭang keuh thei! Chuvangin mi vanneihna hi lo chhin tum ve ngawt chi a ni lova, fimkhur hi himna a nih zawkah hian kan chian a, kan inzirtir mawlh mawlh a ngai.

CHIANG TA CHU:
1. HIV hi engvang pawhin miin kai se, vanduai vang liau liau a nihzia chu hei hian a tichiang hle a, a chhut duh chuan kan hrethiam maiin ka ring.
2. Sex aia inchiuna hriau inhmanṭawm ah kaina chance a san fe zawk laia kan ramah sex avanga kai kan tam zawk fo mai hian ringtu za a za inchhal ṭhin te hi mi hmuh loh chinah ringtu nun vawng zo lo fo kan nihzia a tichiang nasa khawp mai.
3. Hei hian Needle Syringe Exchange Programme leh Condom Promotion te hi do chi ni lovin thlawp em em tur zawk kan nihzia pawh a tichiang hle awm e, Mizoram bika a darh chakna chhan ber te venna bulpui a ni si a.

Hawh teh u, kan nihna kan pawm ngam loh vang leh kan nihna anga kan lan ngam loh vanga kan ram leh hnam HIV in a lak duai duai hi i phal suh ang u.

I inringhlel a nih chuan, HIV kai theihna dinhmuna i din aṭanga ni 90 a tlin veleh i thisen test tir la, i lo vanduai palh ta hlauh a nih pawhin AIDS vei lo turin treatment i la vat thei ang. Vanduai rau rauah treatment la hma apiangin taksa ralvengtu an chân tlemin HIV thunun theihna chance an nei sang tih hi i theihnghilh lo ang u. Tunah ngawt pawh Mizo HIV+ zingah treatment lak ṭhat avanga an thisena HIV hmuh tur awm tawh lo an kat nuk tawh hi..

Nang chuan, he HIV chungchang hi ngaihdana keuh mai lovin lo zirchiang zel ngam la, a thawktute aw ka lo ngaichang ngam ngei nang che..

You may also like:

Updated: July 13, 2019 — 8:40 am

4 Comments

Add a Comment
  1. Risk per Exposure hi 10000 nge 1000 khawi nge rin tur zawk a lem nen en khian?

    1. Kan lawm e, kan update nghal e..

  2. Ava han ṭha ve aw, mite tan a in thawhrimna hi a thlawn mawlh lovang. Pathianin malsawm che u rawh se.

  3. Ava bengvarthlak tak em..👍

Leave a Reply

Your email address will not be published.