Opportunistic Infection leh CD4 inlaichinna!

Kenny Muankima

A hmain Opportunistic Infection (OI) hi engnge a nih kan lo sawifiah tawh a, CD4 leh count chungchang pawh kan lo sawifiah tawh bawk. Tun ṭum chu Opportunistic Infection hran hran, a stage hrang hrang leh CD4 inkungkaihna lai hi kan fimkhurna atan tarlang ve hrim hrim ila a ṭha awm e.

Opportunistic Infection miin a kai theihna dan hi stage hran hran a thliar a ni a, a stage tina an natna kai tlangpui nen a hnuaiah hian ka rawn dah a, a hmasain hei hi lo chik phawt ta ila:

  1. Clinical Stage I: Natna langchhuak tur a la awm lo tlangpui
  2. Clinical Stage II: Âwmvêl
  3. Clinical Stage III: Chuap TB, rei tak chhung kawṭhalo, thlakhat aia rei khawsik, ka chhung nâ (var pip pep in), Pneumonia etc
  4. Clinical Stage IV: Chaw kawng na/fel lo, chuap chauh lo thil dang dang TB, thluaka khawsik lut, tlang hri leng apiang leh natna hluar apiang kai ve zung zung.

Tikhian a stage a san pauh leh a natna ken tel a hlauhawm telh telh tih kan hmu thei ang a. Chuvangin OI hi kan chian a ngai a, chumi nei lo tura treatment kan ngaih pawimawh a ṭulzia hi i hre thar zel ang u.

A tlangpuiin CD4 tlahniam zel hian Clinical Stage sangah mi a luhpui zel a, a hnuaia hi CD4 Cell a zira OI kai/neih theih te ka rawn dah leh bawk a, hei hian a tichiang hle awm e. Hetiangin:

  1. CD4 Count 400: Âwmvêl
  2. CD4 Count 300: Ngawr (TB)
  3. CD4 Count 200: Ka chhung nâ (var pip pep)
  4. CD4 Count 100: Thawhah leh âwm nâ (Pneumonia), chaw kawng nâ leh chiang lo
  5. CD4 Count 50: Tlang hri leng apiang leh natna hluar apiang kai ve zung zung.

Chuvangin OI nei lo tura kan inven theihna sam ber chu CD4 tlahniam lo tura ven hi a ni pakhat a. A vanduai bik tak chuan CD4 hniam lem lo pawhin OI hi neih theih ni tho mahse a bulpui ber chu CD4 hniam hi a nih miau avangin CD4 hniam lo tura treatment ngaihpawimawh leh a hun bi dika ei thlap thlap hi HIV kai tawh tan chuan tihmâkmawh a ni ta reng a ni.

Tin, kan CD4 Count leh Viral Load Count te a thar ber kan hriat zel hian treatment avanga hma kan sawn dan kan hriat theih phah a. Kan treatment kan lo hmasawnpui tawh lo emaw, kan lo mil lo a nih pawhin a hriat chhuahna sam ber a nih avangin HIV kai palh tawh zawng zawng chuan CD4 leh Viral Load count thei turin treatment hi ṭha takin la vek ila, kan count hnuhnung ber leh a hma ami kan count zat khaikhin zel nachang i hria ang u. Mak deuh maiin chu ngawt pawh chuan nasa takin beiseina mi a siam thar thei si a..

Nang chu, HIV vanga i vanduai a, i lo kai ve palh ta a nih pawhin, i hriselna chin chik nachang hria leh treatment ngaipawimawhtu lo ni ngei nang che.

You may also like:

Updated: January 15, 2020 — 1:54 pm

1 Comment

Add a Comment
  1. hiv hi an kai atang in engtik hunah nge symptoms alan chhuah tlangpui?

Leave a Reply

Your email address will not be published.