Stem Cell transplant hmangin HIV a tihdam theih reng em ni!?

Kenny Muankima

Nature chuan Dt. 5th March, 2019 khan UK a damlo pakhat chu stem cell transplant sak a nih avangin a HIV kai tawh pawh a hmuh theih tawh loh thu leh hetiang hi a ṭum hnih thlenna a nih thu a report a. Khawvel news a tling nghal a. Chu chu ram hrang hrang pawhin an mahni ṭawngin an letling nghal sup sup niin a lang. Mizo ṭawnga lettu hmasa ṭhenkhat ten an lehlin kim tawk loh laiin ṭhenkhatin company product hralhna chance zawng ni awm taka chumi behchhana Mizo ṭawnga thuziak a awm ve ta nual niin sawi a a awm bawk. Chung vang te pawh chu a ni ang, PLHIV (HIV+) zingah hemi chungchang hi beiseina nena min rawn zawt an awm leh ṭhin a, thudika lo chhana an beiseina lo chhah sak a va hrehawm ṭhin tak em! Thu thar lamah chuan rintlak ber nia mi tam zawkin an ngaih BBC in a report dan zulzuiin ka thuziak kan chhawpchhuak ve reng reng teh ang. Hetiang zawhna ka dawng leh palh a nih pawha a link ka pek mai theihna tur atan reng pawh!

BBC report in a tarlan dan chuan London lama damlo hi a cancer vanga enkawl mek niin hetiang a nih takah chuan HIV pawh a taksaah thla 18 chhung hmuh tawh loh niin HIV kaite enkawlna damdawi pawh a ei tawh lo hial a ni awm e. Mizo ṭawnga letlingtu tam zawkin an ziah hmaih leh ziah kan lai tak hi a pawimawh lai tak chu a ni lawi si. A chhan chu, a zirbing mi te chuan he damlo hi HIV lak ata chhanchhuah felfai ṭhah a nihzia sawi tur chuan a la hma mah mah an ti! Chu mai a ni lo, hetiang lama mi thiam chungchuang te chuan he thil hi a tihdamna pawh lo ni ta teh reng se la, mi tam zawk tan chuan awmze nei lo a nih tur thu an sawi. Mahse engtikah emaw he hrik la thah theihna atana ṭanpuitu erawh a la ni mial mahna le. Lo theih vek ta tehreng pawh ni se, Mizo zinga HIV kai pal tawh aṭang hian stem cell stransplant ti thei khawpa sum ngah chu kan tam lo tawp ang tih a chiang reng mai.

London damlo kan sawi mek hi a hming tarlan ni lo mahse mipa a nih thu erawh ziah tel a ni a, kum 2003 khan HIV a kai thu hriat chhuah niin kum 2012 khan Hodgkin’s lymphoma an tih mai, cancer chi khat a vei chhoh phah ta hial a ni. Helai point tak te hi a nia pawimawh hlei hlei. A thlawna sorkarin a enkawlna an pek vang te, an taksaa HIV hmuh tur awm lo khawpa ARV an ei ṭhat reng chuan chutianga an awm chhung zawng an kawppui te hnenah HIV an kaichhawng tawh lo nia pawm a nih avang te hian ṭhenkhatin “HIV te chu a hlauhawm loh em mai a, cancer ka hlau fe zawk” te an ti fo ṭhin. Mahse, a nihna takah chuan chung miten an hlauh zawk cancer chu HIV hian a hrin chhuah theih mai piah lamah natna dang – Hepatitis B, Hepatitis C, T.B leh natna dang dang pawh taksaah a seng lut thei a. Cancer ai chuan a let tam takin a hlauhawm fe zawk a ni. Chu mai a la ni lo cheu, miin cancer a vei chuan khawngaih, duhsak leh hmangaih a hlawh a, HIV a kai a nih thung chuan thinhrik leh sawi sep a hlawhzui mai ṭhin. Chuvangin taksa mai ni lova rilru a nghawng em avangin HIV kai hi a hlauha hlauh hluah hluah tur zawk a ni.

He damlo hian Hodgkin’s cancer an tih mai enkawl tura chemotherapy a lak piah lamah, HIV kai mawh tak mihring tu emaw hnen aṭanga stem cells a dawn hmangin a stem cells thlaksak a ni bawk a, tunah rih chuan a HIV leh a cancer te hi a lang chhuak ta rih lo a ni. He case ah hian helam zirbing mi University College London, Imperial College London, Cambridge leh Oxford University aṭang tein an tel niin an sawi.

Hei hi hetiang lamhawi enkawlna vanga taksaa HIV hmuh theih tawh loha mi an awm vawi khatna a ni lem lo a, kum 10 liam ta khan Russia ram mi damlo vannei a lo awm tawh bawk. He Berlin lam mi damlo hi Timothy Brown niin, ani hi a hmasa ber ni a sawi a ni. HIV hnehtu hmasa ber nia sawi hian leukemia veiin a taksa pumah radiotherapy a lak mai bakah transplant vawi 2 a paltlang a. Bone-narrow transplant an tihsak ṭuma a petu hian he virus dotu taksa sipai (immunity) ṭha tak a lo nei a ni awm e.

University College London Prof Ravindra Gupta erawh a ṭawng huai ngang mai a, ani kamchhuak behchhan hian tuna Mizo ṭawnga thu thar an thehdarh mek, PLHIV te ti phawklek vektu te thuziak pawh hi a lo piang ta niin a ngaih theih. Prof Ravindra Gupta chuan, “A kalphung ngai deuh chiaha he damloa HIV hmuh theih loh a nih lehna hian, kha Berlin damlo pa chunga thilthleng kha tihsual palh vanga thleng emaw tihfuh mai mai vang a nih lohzia kan tichiang a, hei hi a enkawl dan tur a nihzia he mite pahniha HIV a hmuh theih tawh loh danah hian a chiang a ni..” tiin a sawi a ni.

Michelle Roberts, BBC Online Health Editor chuan, “He thil an hriatchhuah hi mak danglam viau mahse, hei hian khawvela HIV kai mi maktaduai tam tak te tan enkawlna thar a hawng ta tihna a ni lo. He therapy hautak zetin enkawl a tum ber chu cancer natna a ni a, HIV a ni lo. Tuna HIV kai tawh te tana inenkawlna awm mek (ART) hi a thawk ṭha em em a, a kai te pawhin rei tak tak dam phahin hrisel takin nun an hman theih phah a. Mahse he case hi a pawimawh em em nachhan chu HIV tidam tura kawng thar dap mekte puitu a nih theihna hi a ni. Kawng thui tak la zawh ngai tur pawh ni se, taksa in a do let theih dan hriatthiamna hian beiseina chu a siam a ni..” tiin a sawi ve thung a.

He zirchianna a tel ve Imperial College London Prof Eduardo Olavarria pawhin stem cell transplant hlawhtlinna hian he virus beilet tura kawng thar sial beiseina a hawng niin a ngai a. Chutih rualin fimkhur takin, “He treatment hi chemotherapy te a tel avangin HIV enkawlna tur chu a ni chiah lo, chemotherapy hi chu lymphoma enkawlna tura ṭul chauh zawk a ni.” tiin a sawizui bawk.

HIV hi chi hnih – HIV1 leh HIV2 – a awm a, khawvel puma HIV kan hriat tam zawk hi chu HIV1 hi a ni a. Heng HIV1 te hian cell luhchilh theihna atan CCR5 hi an receptor hman tlanglawn ber a ni a. Khawvela mi tlem te, HIV dolettu nei ṭha bik te hian CCR5 receptor chi hran pahnih an nei a. Chumi awmzia chu chutiang ho taksa a cell te chu a zuk kaina lai thleng turin HIV hian a tawnkau zo lo tihna a ni ber ang chu.

London lama damlo kan sawi mek pawh hian chutiang mi chu donor tur a hmu fuh hlauh mai a, chuvanga HIV pawh lo do let ve thei ta a ni tihna a ni ber awm e. Mahse chutih rualin HIV kaina cell kha khawi lai laiah emaw a lo la awm thei a, chutiang chuan thi si lovin kum tam tak pawh an lo chawl/biru veng veng thei a ni.

UK lama a zirbing mi te chuan Berlin a damlo mai ni lo midang an lo awm leh takah chuan HIV kai teah ah hian CCR5 receptor va bitum tura gene therapy hman te pawh a theih mai theih an ring ta deuh a nih hmel. National Institute for Health Research lama research professor leh Imperial College London lama reader in infectious diseases ni kawp Prof Graham Cooke pawhin heng result te hian a tiphur hle niin a sawi a. “Engvangin nge mi ṭhenkhata a hlawhtlin laia mi ṭhenkhata a hlawhtlin loh tih hi kan hriat theih chuan, HIV tidam tura kan tum ram hi kan hnaih sawt ang. Mahse tun dinhmunah chuan damlo la ṭha tak tak te laka he thil hi enchhin tur chuan risk a la sang lu deuh mah mah a ni..” a tizui bawk.

Cardiff University lama reader in infectious diseases leh honorary consultant physician Dr. Andrew Freedman pawhin report pawimawh leh ngaihnawm tak a nih thu sawiin a hnu lama virus lo lan chhuah leh chhuah loh erawh hun rei zawk enthlak ruk zel ngai tur niah a ngai.

HIV hi a damna tur hmuhchhuah a nih hma zawng chu HIV kai hmuh chhuah leh a kai apiang ART start tir zel hi kan tum ber tur niin a lang a. Chu chu midanga kaichhawn tur venna kawng a nih piah lam HIV kai tawh te pawhin a kai lo te dam chen zet an dam theihna kawng a ni si a.

Chuvangin HIV kai palh te rilru tiphawklek tur leh beiseina lem siam turin a tak hrula niawm ang tak tak thu thehdarh hi sim ila, a hre hmasa nih kan duhna vangin midang i tawrh/nat tir lo ang u.. HIV/AIDS chungchanga thu thar kan ziak duh a nih pawhin a ziktluakin letling ṭhin ila, tidam tura an beiseina neih thar mai mai an tihdam theih tawh thu angin i chhuah tawh lo hram ang u. Tin, chutih rualin HIV kai palh tawh te pawhin HIV leh AIDS chungchangah hi chuan social media a Mizo ṭawnga thu lengvak satliah kan hmuh ai chuan UNAIDS website hi a rintlak fe tih hriain, UNAIDS thu puanzar zawk hi i ngaichang ṭhin ang u.

HIV kan lo ṭawngṭai dam mai mai ṭhin te hi a nihna takah chuan pawi deuh a ni fo! Hei hi ṭawngṭai sawi nepna lam leh Pathian thil tih theihna rinhlelh lam a ni lo, Pathianin a tum ber chu thlarau damna tih hi kan ṭhelh ṭhinzia a ni mah zawk. ICTC tin hi zawt la, miin a ṭawngṭai dam infiah tuma test ṭhat leh tum an lo tawng deuh fur tawh ang. Mahse, an lo la kai vung si a, an beiseina meipui alh hluah tawh leihmih leh thut a nih khan tam tak tan rilru sukthlek dik lo puta Pathian rinna neih loh phahna piah lamah mahni nun lak hial hring palh thei a ni si a, hawh u, kan ngaihdan leh suangtuahna vang maiin he kan ramah hian HIV hi a tihdamna te lo hmuhchhuah tir zung zung lo ila, i lo ṭawngṭai dam ve pawp pawp lo hram ang u!

Reference: BBC

You may also like:

Updated: March 8, 2019 — 1:56 am

1 Comment

Add a Comment
  1. Ka Pu Khawngaih takin ka zawhnate hi min chhang thei Chuan ka lawm hle ang.
    Q1.HIVik hi dar/second engzat nge a dam thei?
    Q2.tui tlemte nena mixed hian a dam thei em?
    Q3.HIV hi Sam dumna bur ah hian a damrei em?
    Q4.Bur thuah atang hian a Kai thei em?Q5.HIV vei in NO4 dah na sam dumna bur ah damdawi lo chawk ta se,a hman zawh hnuah puan/puan chhia in a bur Chu hru fai Leh tahse,bur chhungah Chuan HIV Virus Chu a la dam thei angem?
    Q6.Sam dumna bur ah Chuan HIV hrikpai in damdawi chawk tase a chawk zawh ah chuan NO4 Chu a bur khat in thun Leh nih tase,NO4 damdawi ah Chuan HIV hrik Chu a Kai ve thei a ngem?
    Q7.Thla engzat ah hian hian nge HIV hrik hi thisen test in a lanchhuah thei?

    Ka zawhnate hi a tam deuh hlek a min hrethiam hram dawn nia Khawngaih takin.Ka lawm e.

Leave a Reply

Your email address will not be published.