Damdawi thar – TLD – leh a kaihhnawih!

Kenny Muankima

Kum 2018 October thla daih tawh khan “HIV+/PLHIV te tana chanchinṭha” tih thupui hmanga ziakin tihian ka lo ziak daih tawh a:

Pu Loon Gangte hnen aṭanga kan thu hriat danin India rama HIV/AIDS chungchanga thu neitu sang – NACO chuan TLD chu India rama HIV Positive te treatment lák (1st Line Antiretroviral) atan a pawm ve ta a ni awm a. He thu hi PLHIV te tan chuan lawm luat vanga ṭahpui tham a ni hial awm e..

Ka friendlist a PLHIV zawng zawng te thinlung takin ka lawmpui tak meuh meuh a che u..

TLD hi Tenofovir Disoproxil Fumarate, Lamivudine leh Dolutegravir (DTG) te chawhpawlha ni khata mum khata ei theih tura Mylan leh Aurobindo ten ViiV Healthcare licensing agreement hnuaia an duan chhuah a ni a. Anni hi DTG pangngai lo duangchhuaktute niin United States PEPFAR program hnuaiah US Food and Drug Administration (FDA) chuan hman deuh tawh khan a lo Approve thlak tawh. A man a san em avangin mi zawng zawng tan ban phak a ni lo a, khawvel ram hausa leh changkang chinah chuan an hmang nasa tawh hle…

Damdawi leh a hnathawh dan an zirchianna aṭanga a lan dan chuan DTG telna damdawi (treatment regime) te hian taksa aṭangin virus hmuh theih loh khawpin (viral suppression/undetectable) a siam rang zawk a, side effect a tlem zawk a, tuna HIV te enkawlna atana hman ARV zawng zawng aiin hna a thawk rei theiin a thawk ṭha zawk (greater potency against drug resistance) cheu bawk!

A man sang deuh mahse chuti taka damdawi ṭha a nih si avang chuan hman deuh khan South Africa leh Kenya ah pawh man tlawm zawka PLHIV ten an lei ve theihna turin remna thuthlung an ziak nghe nghe..

Chutiang taka hautak, chutiang taka ṭha ni bawk si, kan ramah a thlawna dawn theih tur a ni ta hi (an process chhung a la fán deuh dawn nachungin, tuna ARV – ART/Treatment la te damdawi ei stock awm sa hi paih mai a uiawm dawn avangin ei zawh phawt te pawh a ngaiin a rinawm) PLHIV mai ni lo, a rampum anga lawmthu sawia ṭawngṭaina tham a ni hial awm a sin..

Heti a nih chuan miin ARV (Antiretroviral Regime) ṭha taka a lak chuan kar lovah undetectable dinhmun a thleng thuai ang a, chumi dinhmun vawnghim reng tura a ei ṭhat chhunzawm zel a nih phei chuan nupui/pasal neih thlengin PLHIV te tan kawng a hawng ve tawh ang a. Mi tam tak saltanna ata chhuah zalen niin mi beidawng tam tak tan zalenna dar a vuak sak ngei ang..

Thank you Mylan, Aurobindo, FDA, UNAIDS & NACO!

tiin NACO in an approve thu Pu Loon Gangte rawn post fiah zawka ziakin ka lawmzia ka lo aupui tawh.

Nikum, kum 2020 October thla khan Dr. Lalchhanhima Ralte, Grace Home, Durtlang Hospital pawhin tihian a rawn ziak leh bawk a:

India sorkar, PLHIV te tana hma la ṭhintu Loon Gangte leh midangte hmalakna kal zelah damlo ten DOLUTEGRAVIR (DTG) a thlawnin an ei ve thei ṭan dawn ta.

– MSACS lam hotute sawi dan chuan HIV positive thar ART ṭan thar tur te chuan TLE aiah TLD an ei ṭan tawh ang, TLE ei mek te pawh a indawtin TLD ah thlaksak an tum. 

DTG hi resistance nei thei lo ang tluka sawi leh side effect nei nep pawl a nih thu hi kum engemaw zah atang khan conference ka kal ṭhinnaa kan lo ngaithlak chamchi a ni a, hetia damloin a thlawna an dawng ṭan tur hi lawmawm takzet. Tha taka ei a nih pawh beisei zel ila, lei dawn chuan to deuh si a nih avangin..

– ART – TLE ei sa, tun hnua zunthlum nei chho, METFORMIN – zunthlum damdawi lo ei mek emaw zunthlum sa, doctor dangin METFORMIN a chawh belh in awm chuan – ART Centre a in TLE, TLD a thlak tura an koh hunah che u in sawi ngei ngei dawn nia. DTG hian thisenah METFORMIN damdawi level hi a tihsan theih avangin, dose adjust a ngai ṭhin dawn a. ART doctor emaw a enkawltu che u doctor khan zunthlum i neih an hriat a ṭangkai.

tiin DTG tel TLD ei tur te tana hriattur pawimawh a rawn aupui a.

Nikum kum tawp lam aṭanga ṭan khan vawiin thlengin PLHIV te ARV ei thlak chhoh mek a ni a, tam tak thlak tawh niin thlak mek leh thlak hmabak an la awm bawk a, chuvangin hriat chian lohna vanga kan lo hlauh emaw buai ruk lohna turin tlem a zawng thai belh ila, lawmna tur zawk a nihzia kan hrethiam theiin a rinawm a. Midang, damdawi thlak avanga lo hlauthawng leh buai te pawh kan hrilhfiah thei ang.

– PLHIV te damdawi ei, antiretroviral (ARV) tin hi a lo berah damdawi chi 3 combine deuh zel a ni a, TLE pawh hi Tenofovir (T), Lamivudine (L, also known ah 3TC) leh Efavirenz (E) inkawp a ni a, damdawi chi 3 mum 1 a siam ti ila a chiang mai awm e.

– TLE hi khawvel ram hran hranin HIV+ te enkawlna tura First Line ARV atana an hman common ber ṭhin a ni.

– Mahse Efavirenz hian side effect chi hran hran – luhai leh luakchhuak, luak, pumna, kawṭhalo, thil paitawih lam harsatna, lu nâ, thil hriat pawlh, haihawt, ngaihṭhat lohna, hlim theih hlawl lohna, beisei deuh si a rilrua buaina, nun hlim lohna, muthilh theih loh leh muthilh rei theih loh, mang ṭha lo, na neuh neuh ang te a nei nawk a.

– DTG tia an sawi mai Dolutegravir erawh khawvela ARV zinga side effect nei tlem bera sawi leh resistance nei mang lova sawi a ni a. Chuvangin a man pawh a tam a, ram changkang leh hausa te chuan an hmanna a rei tawh a ni.

– Kum 2018 October thla khan NACO pawhin India rama hman turin a approve a, Mizoramah erawh nikum kum tawp lam aṭang khan thlak ṭan ve theih chauh a ni.

– Tuna TLE ei mek, TLD a an thlak dan phungah chuan damdawi ei ṭha, Viral Load test thei te zinga Viral Load Suppression nei (an thisena 1000 copy aia tlem hmuh) te chauhin TLD hi an la ei thei rih niin a lang a. Thuawih te vanneihna a ni rih! He damdawi ṭha hi kan ei ve duh chuan hmaih miah lova damdawi kan ei lai TLD kha thla 6 kan ei a, Viral Load test tura min koh thlenga kan lo ei ṭhat a, kan test hunah viral load suppresion (1000 copy aia tlem) kan lo nei a nih chauhin kan start ve thei dawn tihna a nih chu.

– Mahse TLE aṭanga TLD a insawn dawn hian, zunthlum damdawi METFORMIN ei mek emaw, doctor dangin a lo chawh thar emaw kan awm chuan damdawi thlak hma hian ARTC hnenah report ngei chi tih Dr. Lalchhanhima Ralte, Grace Home, Synod Hospital sawi khi kan vawng reng dawn nia.

Damdawi thlâk hian hlauhthawnna a hring thei si a tih thuah kan ziak thar leh hnuhnawh a ni e. Lo hlauthawng lovin TLD ei theia awm kha lo lawm hle zawk rawh u khai. In lo ṭhatpui awk awk dawn nia.

You may also like:

Updated: March 5, 2021 — 6:41 pm

Leave a Reply

Your email address will not be published.